Two Thousand Currency Notes : ఆర్బీఐ కీలక ప్రకటన.. రూ. 2 వేల నోట్లు మీ దగ్గరున్నాయా..?

Two Thousand Currency Notes : రిజర్వ్ బ్యాంక్ ఆఫ్ ఇండియా (RBI) మే 19న రూ.2000 నోట్లను ఉపసంహరించుకునే నిర్ణయం తీసుకుంది, దీంతో ఈ నోట్ల చెలామణీ ఆగిపోయింది. రద్దు సమయంలో మార్కెట్లో రూ.3.56 లక్షల కోట్ల విలువైన రూ.2000 నోట్లు ఉండగా, ఇప్పటి వరకు 98.31% నోట్లు బ్యాంకింగ్ వ్యవస్థలోకి తిరిగి వచ్చాయని RBI తెలిపింది. అయినప్పటికీ, రూ.6,017 కోట్ల విలువైన రూ.2000 నోట్లు ఇంకా ప్రజల దగ్గర ఉన్నట్లు RBI తాజా ప్రకటనలో వెల్లడించింది.ప్రజలు ఇప్పటికీ ఈ నోట్లను బ్యాంకుల్లో జమ చేయవచ్చు లేదా హైదరాబాద్‌తో సహా దేశవ్యాప్తంగా 19 RBI ప్రాంతీయ కార్యాలయాల్లో మార్చుకోవచ్చు. ఈ కార్యాలయాలు బెంగళూరు, చెన్నై, అహ్మదాబాద్, ముంబై, ఢిల్లీ, కోల్‌కతా వంటి నగరాల్లో ఉన్నాయి. వీటిని నేరుగా RBI కార్యాలయాలకు తీసుకెళ్లి సమాన విలువైన కరెన్సీని పొందవచ్చు.మరో ఆప్షన్‌గా, రూ.2000 నోట్లను స్పీడ్ పోస్ట్ ద్వారా RBI కార్యాలయాలకు పంపి మార్చుకోవచ్చు. ఈ ప్రక్రియలో ఆధార్ నంబర్, బ్యాంక్ అకౌంట్ వివరాలు, నోట్ల విలువతో కూడిన ఫారం నింపి, సీల్డ్ కవర్‌లో నోట్లను పంపాలి. RBI వాటిని పరిశీలించి, సూచించిన బ్యాంక్ ఖాతాలో డబ్బులు జమ చేస్తుంది.