Jagan : రాష్ట్రంలో రైతులు ఎదుర్కొంటున్న సమస్యలు, ఎరువుల కొరత, ప్రభుత్వ వైఫల్యాలపై వైఎస్ఆర్ కాంగ్రెస్ పార్టీ అధ్యక్షుడు వైఎస్ జగన్ మోహన్ రెడ్డి తీవ్ర ఆగ్రహం వ్యక్తం చేశారు. రైతుల కోసం పోరాడటం తప్పా అని ప్రశ్నిస్తూ, ప్రభుత్వం రైతుల సమస్యలను పట్టించుకోకపోవడం వల్లే వారు రోడ్డెక్కాల్సిన దుస్థితి వచ్చిందని ఆయన ఆరోపించారు. సకాలంలో ఎరువులు అందించి ఉంటే రైతులు ఈ ఇబ్బందులు ఎదుర్కొనేవారు కాదని, గత రెండు నెలలుగా రైతులు తీవ్ర ఇబ్బందులు పడుతున్నారని జగన్ విమర్శించారు.
సీఎం సొంత నియోజకవర్గం కుప్పంలోనే రైతులు ఎరువుల కోసం క్యూలైన్లు కడుతున్నారని, ఇది ప్రభుత్వ నిర్లక్ష్యానికి నిదర్శనమని జగన్ పేర్కొన్నారు. తమ పాలనలో ఎరువుల కోసం రైతులు ఎక్కడైనా రోడ్డెక్కారా అని ప్రశ్నిస్తూ, ప్రస్తుత ప్రభుత్వం స్కామ్లు, ఆర్థిక దోపిడీలకు పాల్పడుతోందని ఆరోపించారు. రైతుల సమస్యలపై వైసీపీ రాష్ట్రవ్యాప్తంగా ఆందోళనలు చేపట్టినట్లు ఆయన తెలిపారు.
ప్రభుత్వం మెడికల్ కాలేజీలను పీపీపీ విధానంలో ప్రైవేట్పరం చేయాలని చూస్తోందని, ఇది అవినీతికి పరాకాష్ట అని జగన్ ఆగ్రహం వ్యక్తం చేశారు. 1923 నుంచి 2019 వరకు రాష్ట్రంలో కేవలం 12 మెడికల్ కాలేజీలు మాత్రమే ఉండగా, చంద్రబాబు మూడుసార్లు సీఎంగా ఉన్నప్పటికీ ఒక్క ప్రభుత్వ మెడికల్ కాలేజీని కూడా నిర్మించలేదని విమర్శించారు. తమ ప్రభుత్వ హయాంలో 17 మెడికల్ కాలేజీలను ఒక్కొక్కటి రూ.500 కోట్ల ఖర్చుతో నిర్మించి అందుబాటులోకి తెచ్చామని జగన్ గుర్తు చేశారు. ప్రభుత్వ ఆసుపత్రులు లేకుంటే ప్రైవేట్ దోపిడీని ఎవరు అడ్డుకుంటారని ఆయన ప్రశ్నించారు.
సీఎం 6.65 లక్షల మెట్రిక్ టన్నుల యూరియా సరఫరా చేసినట్లు, గతేడాది కంటే 97 వేల మెట్రిక్ టన్నులు అధికంగా ఇచ్చినట్లు చెబుతున్నప్పటికీ, రైతులు ఎందుకు ఇబ్బందులు పడుతున్నారని జగన్ నిలదీశారు. ఎరువులు బ్లాక్ మార్కెట్లోకి తరలిపోతున్నాయని, రాష్ట్ర ఆర్థిక పరిస్థితి తిరోగమనంలో ఉందని ఆయన ఆరోపించారు. విద్య, వైద్యం, వ్యవసాయం వంటి కీలక రంగాలు ప్రైవేట్ వ్యక్తుల దోపిడీకి గురవుతున్నాయని, రాష్ట్రంలో పాలన ప్రజల కోసం కాకుండా దోపిడీదారుల కోసం సాగుతోందని జగన్ విమర్శించారు. వైసీపీ నేతలను అర్థరాత్రి నోటీసులతో బెదిరించే ప్రయత్నాలు జరిగాయని, అయినప్పటికీ రైతుల కోసం తాము పోరాటం కొనసాగిస్తామని జగన్ స్పష్టం చేశారు. రాష్ట్రంలో అసలు ప్రభుత్వం ఉందా అనే అనుమానాలు కలుగుతున్నాయని, ప్రజల సంక్షేమం కోసం ప్రభుత్వం బాధ్యతాయుతంగా వ్యవహరించాలని ఆయన డిమాండ్ చేశారు.
