ISRO : భారత అంతరిక్ష పరిశోధన సంస్థ (ఇస్రో) మరో చారిత్రక ప్రయోగానికి సిద్ధమైంది. జూలై 30, 2025 సాయంత్రం 5:40 గంటలకు శ్రీహరికోటలోని సతీష్ ధావన్ స్పేస్ సెంటర్లోని రెండో లాంచ్ ప్యాడ్ నుంచి జీఎస్ఎల్వీ-ఎఫ్16 రాకెట్ ద్వారా నాసా-ఇస్రో సంయుక్తంగా రూపొందించిన నైసార్ (NISAR – NASA-ISRO Synthetic Aperture Radar) ఉపగ్రహం అంతరిక్షంలోకి దూసుకెళ్లనుంది. ఈ ప్రయోగం భారత్-అమెరికా అంతరిక్ష సహకారంలో కీలక మైలురాయిగా నిలుస్తుంది.
నైసార్ ఉపగ్రహం, దాదాపు రూ.11,200 కోట్ల (1.5 బిలియన్ డాలర్లు) వ్యయంతో అభివృద్ధి చేయబడిన ప్రపంచంలోనే అత్యంత ఖరీదైన భూపరిశీలన ఉపగ్రహంగా గుర్తింపు పొందింది. ఈ ఉపగ్రహం నాసా జెట్ ప్రొపల్షన్ లాబొరేటరీ (JPL) మరియు ఇస్రో స్పేస్ అప్లికేషన్స్ సెంటర్ సంయుక్తంగా రూపొందించాయి. ఇది ప్రపంచంలో మొట్టమొదటి డ్యూయల్-ఫ్రీక్వెన్సీ రాడార్ ఇమేజింగ్ ఉపగ్రహం, ఇందులో ఎస్-బ్యాండ్ (3.20 GHz) స్వదేశీ టెక్నాలజీతో ఇస్రో, ఎల్-బ్యాండ్ (1.25 GHz) నాసా రూపొందించింది.
నైసార్ ఉపగ్రహం భూమి ఉపరితలంపై సంక్లిష్టమైన సహజ ప్రక్రియలను పరిశీలించడానికి రూపొందించబడింది. ఇది ప్రతి 12 రోజులకు భూమి మొత్తాన్ని స్కాన్ చేస్తూ, 5 నుంచి 10 మీటర్ల రిజల్యూషన్తో అధిక నాణ్యత గల చిత్రాలు మరియు డేటాను అందిస్తుంది. ఈ ఉపగ్రహం మేఘాలు, వర్షం, చీకటి లేదా పొగమంచు వంటి అన్ని వాతావరణ పరిస్థితుల్లోనూ పగలు, రాత్రి స్పష్టమైన ఫొటోలను తీసే సామర్థ్యం కలిగి ఉంది.
